Деновиве започна изградбата на најавуваниот крак на атмосферската канализација од повеќенаменското игралиште до реката Водочница кај фабриката 11-ти Септември во должина од околу еден километар, со што ќе се реши проблемот со излевање на атмосферските води кај реципиентот кај игралиштето за што реагираа жителите кај повеќенаменското игралиште во општинскиот центар.
Од општина Василево информираа дека до целосното завршување на активностите, ќе се врши пренасочување на сообраќајот на улицата која води од повеќенаменското игралиште во Василево до објектот на 11-ти Септември за што побараа разбирање од страна на засегнатите учесници во сообраќајот за цело време додека трае неговата реализација. Како што соопштија заради непречено одвивање на градежните активности и непречено одвивање на сообраќајот, трасата ќе биде одбележана а сообраќајот пренасочен со соодветна сообраќајна сигнализација.
Инаку станува збор за проект од околу 4 милиони денари а изведувач на работите градежната компанија Евро-градба, која наредниов период треба да го реализира целиот проект за да се комплетира главната линија од атмосферската канализација во општинскиот центар Василево
„Реализацијата на овој проект во пракса ќе значи целосно и трајно решавање на проблемот со атмосферските води во овој дел од населеното место Василево, бидејќи оваа атмосферска канализација ќе се поврзе со постојната која беше изградена заедно со улицата од поштата до повеќенаненско игралиште. Реципиент на атмосферските води ќе биде реката Водочница, со што ќе го решиме проблемот што сега ни се јавува при обилни врнежи кога доаѓа до излевање на јамата во која завршува постојната атмосферска канализација“, кажа за овој проект градоначалникот на општина Василево, Марјан Јанев кога беше распишан тендерот
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
