Со одлука на Градоначалникот на општина Василево, Славе Андонов деновиве за прв човек на ЈПКД Турија во Василево е назначен 35 годишниот Даниел Иванов од Владевци. Станува збор за дипломиран инженер по информатика кој 12 години има работено во приватен сектор а во својата професионална кариера, се има стекнато и со меѓународни сертификати во областа на бизнисот и менаџментот.
Негова цел е поорганизирано, поефикасно и поквалитетно претпријатие кое ќе биде во служба на граѓаните во Општина Василево со испорака на квалитетни комунални услуги.
„Во ЈПКД „Турија“ ќе се залагам за поорганизирано, транспарентно и одговорно работење, со јасни цели и конкретни резултати. Фокусот ќе биде на подобрување на услугите, рационално користење на ресурсите, модернизација на работните процеси и поголема ефикасност. Верувам дека секој проблем има решение кога има добра организација, професионален пристап и одговорност. Моја цел е „Турија“ да биде стабилно, современо и ефикасно јавно претпријатие, кое работи во интерес на граѓаните и со нивната доверба како најважен резултат.“изјави за Дрнка МК Даниел Иванов кој функцијата ја превзеде од Славица Василевска.
ЈПКД „Турија“ стопанисува со водоводните системи во Општина Василево а од населените места, по однапред утврден редослед организирано го собира и транспортира комуналниот отпад. Како и сите комунални во земјава така и Турија се соочува со слаби ликвидност и ресурси заодговор на тековните предизвици. (В.Т.)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
