Зелениот пазар во Ново Село, кој стана редовна дестинација за пазарување и на жители од соседна Бугарија, ќе добие покривна конструкција. Во Ново Село секој четврток може да се видат коли и автобуси со бугарски регистраски ознаки а на пазарот како купуваат и во поголеми количини. Купувачите од Бугарија велат дека доаѓале бидејќи производите овде биле поевтини и поквалитетни.
„Јас првпат доаѓам. Мајка ми ми предложи да дојдеме. Производите Ви се многу убави, природни, чисти и многу вкусни“, вели посетителка од Бугарија.
„Бугарите ни прават голем промет“ вели продавач на пазарот во Ново Село
Во Општина Ново Село живеат околу седум илјади жители, а зелениот пазар го посетуваат и жители од околните општини. Заради близината од Бугарија најчести гости се жителите на општините околу Петрич и Сандански.
Општината веќе ги започна активностите за реализација на проектот за покривање на пазарот вреден околу 11,5 милиони денари. Според градоначалникот Ѓорѓе Божинов станува збор за површина од 1700 квадратни метри а проектот треба да се заокружи до крајот на годинава по што ќе се пристапи кон асфалтирање на уличката но и осветлување на пазарот. ( В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
