12 тото издание на „Мистериите на Беласица“ и искачувањето на „Ѕвезден врв“ засекогаш ќе го паметат Стефанија Кљанкова и Андреј Стоилков – млади велосипедисти и планинари од Струмица. Тие речиси секоја година учествуваат на овој настан организиран од ВК Актив Струмица кој привлекува се повеќе учесници не само од регионот туку и пошироко.
Но годинава, Андреј и Стефанија се искачија како млади партнери кои се во врска а се вратија како свршена двојка. Андреј на „Ѕвезден врв“ на височина од 1 877 метри со прстен ја побара раката на Стефанија, која пак позитивно одговорила.
,, Не очекував искрено дека ќе се случи тоа, оти не почуствував ништо дека нешто спремаат со неговиот другар. Но сум среќна и благодарна што токму на тој настан се случи тоа. Желба на Андреј му било тоа да се случи на место кое и двајцата ќе го паметиме и на кое ќе се навраќаме секоја година. Горе на врвот кога се искачивме , уживајки во погледот и правејки фотографии од преубавиот пејсаж, Андреј одлучи токму овде да го стави прстенот на мојата рака“ ни раскажа Стефанија.
И двајцата се вљубеници во природата и убавата Беласица која секогаш ја избираат за пешачење, рекреација и уживање преку летниот период. Со години се во врска. За нив планините носат убава енергија и секогаш сакаат слободното време да го трошат во истражување на македонските планини кои изобилуваат со богата флора и фауна.
,, Сакам да упатам порака и апел до сите да ја сакаат природата и убавините кои ги нуди таа. Чувајте ги планините бидејки токму тие понекогаш ги кријат најубавите моменти на некои луѓе. ВК Актив нека продолжат со овие настани кои ги спојуваат луѓето на еден прекрасен начин“ изјави за Дрнка МК младата планинарка и велосипедистка Стефанија (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
