Во недела на петти септември со почеток во 8 часот наутро почнува Пописот на населението, становите и домаќинствата, беше соопштено на прес-конференција во Владата.
Владиниот портпарол Душко Арсовски рече дека сѐ е подготвено за почеток на пописот.
„Во деновите до недела, кога во 8 часот наутро попишувачите ќе излезат на терен, ќе се вршат дополнителни обуки, но и обиколка на пописните кругови со кои се задолжени попишувачите. До недела, секој попишувач заедно со својот реонски инструктор ќе направи и план за движење низ пописниот круг со цел ниту еден објект, ниту едно домаќинство, да не остане неопфатено“, рече Арсовски.
Тој потенцира дека се сигурни како Влада дека граѓаните со доверба ќе ги примат попишувачите и ќе им ги дадат потребните податоци.
Пописот ќе се спроведува до крајот на септември.
Последната ваква статистичка операција во земјава е спроведена во 2002 година.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
