Гевгелиската и струмичката болниа кои се вклучени во прекуграничниот проект „IPA SHIELD in motion“ ќе добијат опрема и инвестиции за подобри здравствени услуги. Станува збор за проект кој го имплементираат со болницата од Кукуш но и грчкото здружение за мултиплекс склероза од Солун. Во реализацијата на проектните активности на Општа болница Гевгелија вклучена е и Фондацијата за локален развој и развој на информатички технологии – Гевгелија (ФЛОРИТ). Тие обезбедуваат поддршка во управувањето со проектните активности и организацијата на настани.
Инаку проект е насочен кон подобрување на здравствените услуги, рехабилитација и современа здравствена заштита на населението во прекуграничниот регион меѓу Македонија и Грција. Фокус се пациенти односно лица кои живеат во руралните и оддалечените средини, потоа повозрасни лица и лицата со здравствени состојби поврзани со ограничена подвижност.
„Во Општата болница во Гевгелија проектот предвидува целосна реконструкција и модернизација на одделот за физикална терапија, со што ќе се подобри пристапноста и ќе се зголеми капацитетот за третман на пациенти кои закрепнуваат од повреди и хируршки интервенции, како и на лица со хронични состојби кои влијаат врз мобилноста. Додека во Општата болница во Струмица ќе биде инсталиран современ дигитален рендген апарат, со што ќе се подобрат брзината и точноста на дијагностиката и ќе се овозможи порано откривање на состојби поврзани со коските, зглобовите и мобилноста. “ стои во проектните активности за партнерите на македонска страна
Првиот човек на ЈЗУ Општа болница Патрик Матх веќе потпиша договор за реконструкција на одделот за физикална терапија со радовишка фирма во висина од околу 208 илјади евра
„Со реконструкцијата ќе се создадат современи, функционални и поквалитетни услови за пациентите и здравствените работници, а одделението за физикална терапија ќе добие значително подобрена инфраструктура за обезбедување здравствени услуги. Оваа инвестиција претставува уште еден значаен чекор кон модернизација на нашата институција и унапредување на квалитетот на здравствената заштита за граѓаните на Гевгелија и пошироко во регионот“, објави директорот Матх на ФБ
На грчка страна, во општа болница во Кукуш се планира Лабораторија за анализа на движењето и евалуација на перформансите (MAPEL) која ќе овозможи биомеханички проценки, евалуација на физичките перформанси и подготовка на индивидуализирани планови за рехабилитација. Грчкото здружение за мултиплекс склероза пак ќе развие мобилна апликација преку преку која корисниците ќе имаат пристап до персонализирани програми за вежбање, следење на симптомите и мрежи за меѓусебна поддршка.
Проектот се реализира во рамките на Interreg VI-A IPA Programme Greece – North Macedonia 2021–2027, во рамките на Приоритет 3 – Поддршка и унапредување на здравствените и социјалните услуги. Активности се реализираат на подрачјето на Кукуш, Солун, Гевгелија и Струмица и опфаќаат прекуграничен регион со повеќе од 126.000 жители. Тој е продолжување и надградување на резултатите постигнати преку претходниот проект IPA SHIELDII, реализиран во програмскиот период 2014–2020.
В.Трајков
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
