Во тек е реализацијата на втората фаза од проектот „Конзервација и реставрација на одбранбената кула Пирго“ на локалитетот „Пирго Каљ’ната“ во село Мокриево, Општина Ново Село, објавија од НУ „Завод и Музеј Струмица“. Од објавените фотографии се гледа дека мајстори интензивно се работат на санација на оштетените бедеми на кулата во основата за поголема стабилизација на истата.
Кулата има маркантни димензии и се претпоставува дека била користена во периодот на Цар Самуил е со квадратна основа 10 на 10 метри, дебелина на ѕидовите некаде околу 3 метри. Изградена е во техника со добро обработени изделкани камења со добри внатрешни и надворешни лица.
„Овој тип на кули ги датираме од 5 и 6 век, односно Рана Византија, изградена во техника емплектон, односно со добро изделакни камења, а како врзивно средство е користен варовиот малтер. Овие кули покрај тоа што се користени во 5 и 6 век век, се јавуваат и во текот на целиот среден век. Знаеме дека фортификационите објекти со делумна обнова биле користени и во средниот век и сметаме дека оваа кула била ставена во функција и во периодот на Цар Самуил“, вели д-р Душко Цветанов – виш кустос, археолог.
Раководител на проектот е м-р Симона Јованова, виш конзерватор архитект, а кораководители се професор д-р Трајче Нацев, советник конзерватор, и д-р Душко Цветанов, виш кустос археолог.
Проектот е финансиран од Министерството за култура и туризам, а од НУ „Завод и Музеј Струмица“ упатуваат благодарност до Општина Ново Село за логистичката поддршка и одличната соработка при реализацијата на проектот.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
