Застарената водоводна мрежа и честите дефекти на препумпните станици беа причината за слабиот притисок и прекинот во водоснабдувањето во Дојран изминативе денови за што општинските власти извршија санација и инсталираа нови станици за контуиниран дотур на вода во горните делови од ова туристичко место. Првиот човек на општината Анго Ангов смета дека проблемите се надминати и се надева дека ова лето ќе има контуинирано водоснабдување со оглед дека се поставени нови 4 станици за што општината инвестирала околу 100 илјади евра.
„Имавме проблеми, но веќе се надминати. Во соработка со комуналното претпријатие ‘Полин’ успеавме, работевме и по 24 часа за да ги санираме сите дефекти на водоводната мрежа, а набавивме и 4 нови препумпни станици од бунарите кои ќе вршат дотур на вода до горните делови, за што инвестиравме околу 100 илјади евра во овој период, бидејки доаѓа и туристичка сезона. Станува збор за дотраена и стара мрежа повеќе од четири децении, која како мала Општина немаме многу пари сами да ја обновуваме и затоа мислевме дека ќе беше добро да има јавно-приватно партнерство, но жителите си кажаа не на референдумското изјаснување“, ни рече градоначалникот на Дојран Анго Ангов.
Дојран со вода се снабдува од четири бушотини и извори со вкупно 60 литри во секунда кои доаѓаат до водоснабдителни бунари, од каде со препумпни станици се врши дотур до домаќинствата. Градоначалникот Ангов смета дека најдобро решение е овој туристички центар да се приклучи на хидросистемот Ѓавато за да трајно се реши водоснабдувањето, за што се портебни околу 400 илјади евра.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
