Општина Василево со средства од Бирото за регионален развој но и со средства од општинскиот буџет ќе врши реконструкција, санација и адаптација Дом на култура во општинскиот центар Василево. Веста ја објави градоначалникот Марјан Јанев на својата официјална ФБ страна потенцирајки дека е избрана фирмата изведувач на работите по спроведената јавна набавка.
Како што стои во објавата, фирмата ,,Портланд-Опц ДООЕЛ’’ од Струмица ќе го реконструира Домот кој треба да биде завршен во рок од 4 месеци од денот на воведување во работа на изведувачот. Вредноста на договорот изнесува околу 220 илјади евра од кои 150 илјади се обезбедени од Бирото за регионален развој. Како што информира градоначалникот Јанев изведувачот ќе почне со работа веќе од понеделник.
Според техничката спецификација ќе се врши целосна санација на објектот при што ќе биде сменета кровната конструкција, демонтажа на постоечката плафонска конструкција од трска и варов малтер, ќе биде отстранета сегашната и инсталирана нова ПВЦ столарија, ќе биде отстранета сегашната дрвена и изградена нова бина, ќе се уреди внатрешниот простор и санитарните јазил а објектот ќе добие и нова фасада.
,,Конечно граѓаните во општина Василево од сите населени места ќе добијат простории, сала за одржување на свечености и културни манифестации од секаков вид, на овој начин ги подобруваме условите за живот во општина Василево’’ напиша Јанев
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
