Напуштањето на помалите места во последните години стана секојдневие. Сe почесто слушаме како младите својата иднина ја гледаат надвор од родното место или во поголемите градови, барајќи подобри можности за работа и подобра перспектива. Но, не е секаде така.
Ова најдобро го потврдуваат младите од струмичкото село Куклиш. Иако тука најголемиот дел од населението, па и поголем дел од самите млади, секојдневно се занимава со напорна работа во земјоделството, тие сепак наоѓаат време и начин самите да се организираат и да ја чуваат културата, традицијата и фолклорот.
Главниот виновник за ова позитивно движење е КУД „Браќа Минкови“. Ова друштво е местото каде што младите ги заменуваат секојдневните обврски со игра и песна. Наместо пред екраните, тие своите вечери ги поминуваат во салата, каде што се дружат, учат нови кореографии и создаваат силни пријателства.
Иако секој од нив има свои обврски во училиштето, на факултет или на нивите, кога ќе започне пробата, се друго се заборава. Под водство на нивните раководители, тие секојдневно ги усовршуваат сложените македонски ритми, свесни за тежината и вредноста на народната носија што ја носат на себе.
Но, креативноста на овие млади луѓе не застанува само на сцената. Од неодамна, во рамките на друштвото функционира и ликовна работилница. Преку неа, дел од членовите ја искажуваат својата уметничка страна и креативност, создавајќи вредни уметнички дела. Овие творби потоа, како уникатни и рачно изработени подароци, им ги предаваат на друштвата домаќини каде што гостуваат, оставајќи траен белег од нивното пријателство.
КУД „Браќа Минкови“ не е само салата за вежбање, туку прозорец кон светот. Преку патувањата и меѓународните фестивали, младите имаат можност да запознаат нови култури, да видат нови земји и да создадат спомени кои ќе ги паметат цел живот. Она што е најважно, тие со гордост ја претставуваат македонската традиција на фестивали низ целата држава, но и надвор од неа. Каде и да се појават, тие предизвикуваат воодушевување кај публиката, оставајќи ги без зборови сите што ги гледаат нивните настапи.
Во време кога се зборува за пасивност на младите, играорците од Куклиш со својот пример ги рушат сите стереотипи. Тие покажуваат дека руралната средина не е пречка, туку може да биде предност кога има јасна цел и слога. (З.Ѓоргиев)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
