Жители од Секирник Општина Босилово отпочнаа акција со која треба да му дадат нов лик на зелениот парк сред село каде се наоѓа и споменикот на Русалиите. Акцијата произлезе откако лани пред патрониот празник „Пресвета Богородица“ повозрасните на Секирник заедно со помладите организираа еко акција со која го чистеа паркот. Сега жителите со поддршка на дијаспората од Швајцарија решија преку работни акции да го уредат паркот кој носи спомени на голем број генерации на жители од оваа место.
„Во акцијата се вклучивме повеќе луѓе со кои уште од порано имавме заеднички разговор и идеа тоа да го правиме почесто со цел за подигање на свеста на луѓето и младите. Сметам дека мора и ние како граѓанско општество да придонесеме нешто позитивно за нашето село и не само да чекаме институциите да ни завршат работа. Сите знаеме каков им е капациетот на институциите и дека нема доволно луѓе за да се постигне целта“ ни изјави Наско Панов од Секирник.
Според него, паркот е со површина од околу декар и половина. Таму во наредниот период се планираат повеќе акции кои треба да му дадат нов лик на оваа зелено катче. Таму веќе е доставена новата оградна мрежа набавена со пари обезбедени од жители на Секирник кои живеат во Швајцарија .
„Во наредниот период планираме да направиме едно детско катче со некои реквизити. Планираме да го обновиме стариот ѕид со нов и да го оградиме со квалитетна мрежа. Средствата се обезбедени од Црковниот одбор но и од нашинците од Швајцарија. Понатаму планираме да насадиме неколку дрвца со цел во летниот период да имаме повеќе сенка. Со наши средства ќе бидат набавени и клупи за одмор а во соработка со Општина Босилово и градоначалникот Ристо Манчев во план е да се осветли оваа пркова површина“, потенцираше Панов
Инаку жителите на Секирник планираат и регистрација на граѓанско здружение преку кое ќе се планираат сите работни акции во иднина во интерес на селото но и место каде правно ќе се артикулираат потребите на граѓаните на Секирник и да се дејствуваат пред институциите.
„Сакаме да испратиме силна порака до младите, дека ние самите мора да се грижиме за нашето место за живеење бидејќи тоа ќе ни остане на нас. Треба ние самите да бидеме пример на идните генерации кои допрва ќе доаѓаат и сметам дека мора од некаде да почнеме да ја будиме свеста на нашиот народ дека чистата средина значи и здрава нација“, подвлече за Дрнка МК Наско Панов
В. Трајков
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
