СВР Струмица – Надворешната канцеларија за криминалистички работи Валандово поднесе кривична пријава против К.С. (66) и М.Г. (54), двајцата од Валандово, поради сомнение дека сториле кривични дела „измама во службата“ и „фалсификување службена исправа“, соопшти МВР.
Според информациите на МВР, првопријавениот, во својство на претседател, и второпријавениот, како секретар на Општинскиот фудбалски сојуз Валандово, во периодот од 2021 до 2025 година регистрирале повеќе фудбалски клубови за настап во општинската фудбалска лига, иако тие не ги исполнувале минималните услови за број на играчи предвидени со правилникот на ФФМ.
Со ваквите дејствија, како што наведува МВР, овозможиле зголемување на бројот на делегати во Собранието на ФФМ, на кои потоа им биле исплаќани надоместоци по различни основи. На тој начин, за себе и за други лица, осомничените прибавиле противправна имотна корист од околу 1.350.000 денари.
Исто така, пријавените составувале записници за наводно одиграни натпревари, во кои внесувале невистинити податоци за лица кои биле наведени како учесници, иако дел од натпреварите, според пријавата, воопшто не биле одиграни.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
