ВK „Актив“ од Струмица на 27 и 28 јуни ќе го реализира 12-тото издание на „Мистериите на Беласица 2026“. Љубителите на природата и планината ќе имаат можност да изберат помеѓу тура со планински велосипед или пешачка тура до „Ѕвезден врв“ на Беласица, на надморска височина од 1.877 метри. .
Според програмата, во сабота, на 27 јуни, учесниците ќе тргнат од селото Борисово и ќе пристигнат во камп зоната на ВК „Актив“ на 1.100 метри надморска височина. Во вечерните часови е предвидена заедничка вечера и дружење со акустична музика, за што ќе биде задолжен Горан Алиќ. Вториот ден, по појадокот, ќе следува искачувањето до „Ѕвезден врв“, по што учесниците ќе се вратат во кампот, каде што ќе имаат ручек, а потоа ќе следи спуштањето кон селото Борисово.
Организаторот ВК Актив информира дека транспортот на тешкиот товар, како што се шаторите, вреќите за спиење и другата камп опрема, ќе биде обезбеден од ВК „Актив“.Котизацијата за учество изнесува 1.000 денари, а во неа се вклучени место за поставување шатор, три оброци – вечера, појадок и ручек, како и пакет од настанот.
Од клубот потсетуваат дека секој учесник е одговорен за својата физичка и психичка подготвеност, додека за малолетните лица е задолжителна придружба и согласност од родител или старател. Воедно, апелираат до сите учесници да ја зачуваат природата, бидејќи фрлањето отпад е строго забрането.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
