Младата оперска пејачка Сара Јанева од Сушица општина Ново Село, утре во црквата ,,Света Софија“ во Охрид ќе одржи солистички концерт насловен „Корени“ каде на програмата ќе бидат дела од македонски композитори. Станува збор за нов солистички концерт на младата Јанева која досега свои настапи имаше во Скопје, Битола, Струмица а била дел и од фестивали и концерти во Бугарија, Словенија, Италија и Германија.
За Јанева концертот во Света Софија во Охрид ќе биде можност низ музика и оперско пеење да се презентира животот на македонскиот народ, природните убавини, македонските херои, тагата, болката….
„Концертот е насловен ,,Корениʼʼ бидејќи на програмата се композиции само од македонски композитори. Во дел од нив се опишува животот на македонскиот народ низ годините, се спомнуваат природните убавини на земјата, нашите херои и тагата и болката низ кој минувал народот во текот на војните. Овој проект беше изведен веќе во Швајцарија и беше еден многу емотивен концерт. Очекувам публиката да ужива во делата на нашите македонски композитори и сметам дека оваа програма ќе допре многу длабоко до секој македонец кој ќе биде присутен на концертот оваа сабота во Охрид“, вели за Дрнка МК Јанева
Инаку младата оперска пејачка, музичкото образование го започна на 8 годишна возраст како ученик по пијано. Средно музичко отсек соло пеење завршува во ДМУЦ ,,Сергеј Михајловʼʼ во Штип а дипломирала на УКИМ- Факултет за музичка уметност во Скопје, во класата на професорката Весна Гиновска-Илкова.
Од 2024 до 2026 Јанева е дел од оперското студио на Факултетот за уметности во Берн, Швајцарија во класата на професорката Малин Хартелиус. Во јуни 2025 дебитира во улогата на Анио во Моцартовата опера La Clemenza di Tito со оперскиот театар во Бил. Во септември дебитира како Втора дама во Моцартовата опера Die Zauberflöte. Покрај театарот во Бил и Солотурн, со оваа продукција таа исполнила 25 претстави. Оваа годиан дебитира во улогата на Лизета во операта La Frascatana на Џ.Паисиељо исто така во театарот во Бил под диригентска палка на маестро Франко Тринка. Покрај оперскиот репертоар, концертирала со Стабат Матер на Дворжак и Перголези, како и Миса на Јомели и Кемптер. (М.К.)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
