Националната федерација на фармери во дојранско Фурка ја организираше годинашнава „Јуфкијада“ на која учествуваа околу 80 жени од сите региони на државата. Сите тие во дворот на црквата Св. Илија сукаа јуфки на традиционален начин кои потоа се сушеа на јунското сонце.
Со оваа уникатна манифестација официјално НФФ го означи почетокот на кампањата „Жените земјоделки – од традиција до иновација“, која се реализира во рамки на одбележувањето на Меѓународната година на жените земјоделки, прогласена од Обединетите нации.
На присутните жени учеснички во Фурка им се обратија Стеванче Јорданоски, претседател на НФФ, Илија Тентов, градоначалник на Општина Дојран, Каранфилка Тодорова, локална координаторка на Мрежата на жени фармери, како и Билјана Митревска, проект менаџерка во НФФ.
Во своите обраќања тие ја нагласија важноста на зачувувањето на традиционалното производство на јуфки, но и непроценливиот придонес на руралните жени во развојот на земјоделството, локалната економија и одржливите рурални заедници.
Откако заврши манифестација околу 67 килограми исушени јуфки беа донирани во собирниот центар за социјално загрозени семејства во дојранскиот регион. Тие преку Фондацијата Елеуса ќе бидат дистрибуирани за семејствата на кои им се неопходни (В.Трајков)
фото НФФ
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
