Центарот за развој на Југоисточниот плански регион ќе уредува дел од коритото на река Сушица во Радовиш со цел да се спречат или намалат последиците од поплави при обилни врнежи од дожд или најдојдени води. Станува збор за проект со кој Центарот аплицираше од Програмата за прекугранична соработка со соседна Бугарија и доби околу 588 илјади евра со кои се планирани повеќе активности на потег од околу 630 метри од речното корито на Сушица кое преставува и најкритично место.
Согласно проектот кој ќе трае две години, се планира чистење на коритото на реката, поставување каскадни прагови, изградба на кејски ѕид, уредување на дното, градење скали и рампи. Раководителот на Центарот за развој на Југоисточниот плански регион, Жулиета Ѓуркова го потпиша договорот за проектот „Заеднички мерки за спречување и намалување на последиците од катастрофи во општините Сандански и Радовиш“ кој ќе го имплементира заедно со општина Сандански од Бугарија
,,Ваквите активности ќе овозможат да се уреди коритото на реката, а ќе се изврши и пошумување и озеленување околу коритото со што ќе се направат чекори кон намалување на негативните последици од поплавите, како и кон прилагодување на климатските промени во иднина. Исто така, ќе се подобри квалитетот на живот на граѓаните во прекуграничниот регион преку зголемување на безбедноста од природни катастрофи, информираа од Центарот за развој на Југоисточниот плански регион.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
