Околу 7,3 милиони евра од заемот од Светска Банка се алоцирани за општините од Југоистокот за локaлни патишта и улици

2617

Околу 7 милиони и 300 илјади евра ќе треба да добијат општините од Југоистокот за подобрување на патната инфраструктура од Проектот за поврзување на локални патишта, за кој државата обезбеди заем од Меѓународната Банка за обнова и развој – Светска Банка. Ваква одлука донесе Владата на седница при крајот на минатата година со која се алоцирани средства за секоја општина одделно колку може да добие од овој заем.

Станува  збор за дел од средствата од заемот во висина од приближно 70 милиони евра кои државата ги има обезбедено од Меѓународната банка за обнова и развој – Светска Банка. Парите општините ќе треба да ги искористат за рехабилитација, реконструкција и надградба на локални патишта и улици, вклучувајки и дополнителни работи и надзор на градежните работи и проектирање.

Согласно Владината одлука, за општина Богданци  алоцирани се средства во висина од околу 599 илјади евра, за општина Босилово 674 илјади евра, за општина Валандово 728 илјади евра а за општина Василево 671 илјада евра. Општина Гевгелија од овој Договор за заем за проектот  може да добие околу 824 илјади евра, општина Конче околу 602 илјади а општина Ново Село 666 илјади евра. За подобрување на патната мрежа преку овој заем, општина Радовиш може да очекува околу 893 илјади евра а општина Струмица милион и 40 илјади евра.

Општините ќе мора во наредниот период да изработат или достават проекти за рехабилитација, реконструкција и изградба на локални патишта и улици во рамки на висината на алоцираните средства од Владата за да може да бидат одобрени и ги користат парите од Заемот од Светска Банка за поврзување на локални патишта.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.