Финансиска поддршка за субвенциониран студентски оброк ќе добиваат студентите од месец октомври, со почетокот на новата студиска година. Средствата ќе се уплаќаат директно на лична сметка, со што ќе им се даде можност на студентите, освен во угостителски објекти, да ги користат и во маркетите.
„Оваа новина е предвидена поради пандемијата и евентуалните рестриктивни мерки на есен. Можеби сега мерките се релаксирани, но не знаеме што ќе се случува во септември, октомври, ноември, декември кога студентите ќе треба да го добиваат овој додаток, а замислете рестораните се затворени и работат само продавниците. Со законските измени овозможуваме ова право да се оствари независно од пандемијата и тие да може да си обезбедат оброк и од маркетите“, истакна министерката за образование и наука Мила Царовска.
Таа потенцираше дека студентите се задоволни од ова решение, кое е прифатливо за нив, а државата дури и во услови на пандемија покажува грижа и дава можност за искористување на средствата што се наменети за студентите.
Финансиската поддршка за субвенционираниот студенстки оброк на месечно ниво изнесува 2.400 денари. Проекциите за 2021/2022 година се дека ќе го користат околу 40.000 студенти, за што се обезбедени средства во буџетот на МОН.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
