Второлигашот Струмица е на добар пат да го врати сјајот на сениорската кошарка во Струмица, кој секогаш се сметал за кошаркарски град, за што упатувам благодарност до општината и градоначалникот Коста Јаневски кои го препознаа и застанаа зад овој проект. По првиот круг од младите момци во КК Струмица сум задоволен, бидејки покажаа дека може да се носат со предизвикот сениорско натпреварување што му недостасуваше на градот од кој и јас потекнувам. Вака искоментира Владо Илиевски струмичкиот кошаркарски интернационалец кој се вклучи во КК Струмица со цел да се врати натпреварувањето во сениорска конкуренција по првиот круг од второлигашкото натпреварување.
,, Проектот КК ,,Струмица’’ во кој се вклучив мислам дека дава резултати. Во Втората лига Исток сме во самиот врв, што доволно укажува дека сме на добар пат да се врати сениорското кошаркарско натпреварување во Струмица, град кој се смета за расадник на млади кошаркарски таленти. Секако дека тоа е резултат и на Општина Струмица и градоначалникот Коста Јаневски кои го помагаат проектот да се врати сјајот на струмичката кошарка. Лично не сакам да се ,,залетуваме’’, сакам чекор по чекор да градиме клуб кој ќе даде можност на младите од Струмица да ја продолжат својата кариера и како сениори ’’ ни изјави Владо Илиевски кој смета дека во клубот дава шанса на секој кошаркар кој сака да го оствари својот кошаркарски сон
КК ,,Струмица’’ во Втората лига Исток има 7 победи и 2 пораза, со што се на втората позиција во ова друштво и повеќе од сигурно дека ќе разигрува во Плеј офот за пласман во Првата кошаркарска лига. Системот налага првопласираните четири екипи од источното и западното друштво да одиграт мечеви и најдобриот да се најде во кошаркарската елита.
,, КК ,,Струмица’’ секогаш ќе даде можност на струмички деца. Нашата цел е да градиме млади квалитетни кошаркари кои низ кошаркарски кампови, турнири и со натпреварувања како во младинска така ќе им се даде можност да се натпреваруваат и во сениорска конкуренција. Секако тоа не се прави за една сезона, туку треба работа, трпеливост и единство за да на крај бидеме горди и дај боже повторно да имаме кошаркарски репрезентативци и интернационалци од Струмица,, ни изјави Владо Илиевски со богата кошаркарска кариера а своевремено и носител на играта на македонската кошаркарска репрезентација.
Следното коло второлигашот Струмица на свој терен ќе игра со Борец од Велес од кој во есенскиот дел од првенството претрпеа пораз.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
