Езерото Мантово кај Конче ќе добие патеки, урбана опрема, осветлување за да стане атрактивна езерска населба за туризам

7580

Рехабилитација на патот брана Мантово – село Габревци во должина од 6.5 километри, мапирање и одбележување на две пешачки патеки од 3 километри, осветлување на локалитетот Влашки колиби, поставување урбана опрема во туристичката населба Мантово, се дел од активностите што ќе се реализираат во Општина Конче од проектот за локална и регионална конкурентност – ЦРЛП. Општина Конче го потпиша договорот со проектниот тим од  Програмата за локална и регионална конкурентност за реализација на овој проект кој треба да донесе развој на туризмот во ова општина.

Целта на овие активности, за што преку Светска Банка и ЕУ, општина Конче обезбеди околу 280 илјади евра е да се подобри пристапот до ова викенд населба и да стане туристичка атрактивна за посетителите, со оглед на одличната местоположба и прекрасната природа. Езерото Мантово во последниве години стана посетувана дестинација. Се градат викендици а од пред неколку години таму се изградија и дрвени влашки колиби но и понтаму останува неискористен потенцијал.

,,Како општина аплициравме со проект од Програмата за локална и регионална конкурентност со кој сакаме да му дадеме нова димензија на езерото Мантово за да прерасне како туристичка атракција. Проектот во висина од околу приближно 18 милиони денари е одобрен и наскоро ќе отпочнат активностите. Целта е да го развиеме рекреативниот и алтернативен  туризам оти Мантово нуди огромни потенцијали. Се надевам дека со пристапот што ќе го овозможиме ќе потикенеме и нови инвестиции ,, изјави за Дрнка.МК градоначалникот на Конче Благој Илиев

Езерото „Мантово“ е вештачка акумулација на реката Крива Лакавица во југоисточниот регион на државата. Околината на езерото се карактеризира со чист воздух, прекрасен пејзаж и пријатна микроклима. Пријатната клима со температура на водата од 24ºC во летниот период е погодна за капење и практикување на водните спортови. Застапеноста на повеќе видови на риби создаваат добри предуслови за спортски риболов, а издолжените вертикални граматни карпи во близина на ридот Габровска Чука овозможуваат добри услови за алпинистичко искачување.

фото www.mojrodenkraj.com.mk

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.