Доброволците од Дојран и Конче први излегуваат при пожар а кубурат со опрема и возила (фото)

1412

,,Иако располагаме со минимална опрема и застарени возила од донации секогаш први интервенираме при појава на пожари во нашите заедници’’. Вака раскажуваат волонтерите од двете доброволни противпожарни друштва од Југоистокот ,,Горици’’ од Конче и ,,Дојран’’ од Дојран  кои од државата бараат посериозен третман, опрема и теренски возила за справување со пожарите во средини до кои на професионалните единици им се потребни и по половина час за да стасат.

Доброволното друштво ,,Горици’’ од Конче е формирано пред три години. Брои околу 15 членови а од опрема имаат цистерна на тракторска приколица кои ја позајмуваат и минимална заштитна противпожарна опрема. Илчо Ѓеоргиев вели дека се одлучиле да формираат друштво бидејки последниве години зачестиле шумските пожари во општина Конче а за да стасаат првите возила од ТППЕ Радовиш поминува најмалку половина час.

,,  Во друштвото членуваме претежно повозрасни. Нема мотивација да се вклучат младите кои се помалку ги има. Паралелно немаме ниту возила ниту соодветна опрема. Еве ние немаме теренско противпожарно возило. Користиме седум тонска тракторска цистерна на ЈП Лакавица. Со неа гаснеме кога ќе се појави пожар во Конче и околните села. Треба да се превземе нешто, да добиеме опрема но и да имаме контуинирана обука и едукација за да помогнеме на жителите од општина Конче при пожар,, ни изјави Ѓеоргиев претседател на ДПД ,,Горици’’ оператива Конче.

Не е поразлична сликата и со Доброволното противпожарно друштво ,,Дојран’’ иако имаат нешто подобри капацитети. Друштвото брои околу 20 члена. Имат опрема претежно од донации и две противпожарни возила кои се стари, но функционални.  Претседателот на друштвото Стојанчо Шулев вели дека државата во иднина треба посериозно да гледа на овие друштва кои први излегуваат во средини каде нема професионални единици.

,,Како друштво сме формирани во 2000- тата година кога имавме голем пожар во Дојран во кој три куќи целосно изгореа. Активни сме десетина членови додека останатите се по населени места кои се активираат во случај на пожар во нивните села. Ние сме вработени по фирми но ако се појави пожар се мобилизираме и излегуваме веднаш оти за да стасаат возилата од Гевгелија или од Валандово потребни се минимум 40-тина минути. Се соочуваме со недостиг на опрема за да може подобро да функционираме. Еве имаме две возила едното е од 1978 а другото 1983 година,, вели Шулев.

Во отсуство на официјална државна статистика се претпоставува дека во Македонија има околу 15 тина доброволни противпожарни друштва кои функционираат иако во Централен регистар се водат околу 34 друштва организирани на доброволна база. За разлика од Македонија во соседна Бугарија се евидентирани дури 240 доброволни противпожарни друштва во кои членуваат 3 200 лица и се вклучуваат како при појава на шумски пожари така и при технички интервенции.

,, За развојот на доброволни друштва голема и основна улога има државата. Кај нас државата финансиски ја поддржува оваа дејност преку обезбедување дневници за доброволците,  нивна обука, обезбедува средства за набавка на опрема и заштитни одела. Едноствано како еден вид награда за нивниот доброволен ангажман и сето тоа е регулирано во една правна рамка.  Доброволците кај нас се еден вид помагатели на професионалните пожарникари. Обично тие најпрво дејствуваат во средините каде ќе се појави пожар. Мора поддршка и контуинирана едукација и обука на доброволците ако сакате да функционираат ефикасно,, истакна Пламен Тодоров од Дирекцијата за заштита и спасување на Бугарија

Дел од волонтерите на двете доброволни друштва од Конче и Дојран деновиве се вклучија во обуките со професионални колеги од Југоистокот и соседна Бугарија за да стекнат дополнителни вештини и знаења како да се справат со шумски пожари но и да спасуваат лица при природни катастрофи што ги организираше Центарот за развој на Југоисточниот плански регион во рамките на проектот ,,Прекугранична соработка за справување со шумски пожари’’. Целта на проектот преку кој беа набавени нови униформи специјални за шумски пожари е да се формираат и нови доброволни противпожарни друштва во Југоистокот .

В.Трајков   фото ФБ

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.