Во Струмица се одржа јавната акција „Активни жени, инклузивни општини: За еднакви можности и права“, во организација на Организацијата на жени од Струмица, заедно со активистки од Женските кружоци од градот и населените места во струмичкиот регион.Акцијата има за цел да го сврти вниманието за унапредување на статусот, положбата и улогата на жената во заедницат и кон поголемо учество на жените во процесите на планирање и донесување одлуки на локално ниво.
Настанот се реализира како симболична уметничка интервенција во јавен простор, која претставуваше метафора за „метаморфоза“ – трансформација на општествената свест кон поголема еднаквост и инклузија. Просторот беше исполнет со балони со пораки за права и еднаквост, кои создадоа визуелен амбиент што ги повикува граѓаните на размислување и дијалог.
Еден од клучните елементи на акцијата е интерактивната уметничка инсталација – силуета на витез, наменета за активно вклучување на мажите во борбата за унапредување на женските права и инклузивни локални процеси. Посетителите имаа можност симболично да „станат витези“ така што ќе се фотографираат како заштитници на женските права, откако ќе ја прифатат заклетвата за почитување, поддршка и заштита на правата, достоинството и слободите на жените.
Со прифаќањето на оваа „заклетва“, учесниците симболично ја добиваа титулата „Витез за заштита на женските права“, со пораки како: поддршка на гласот на жените, почит и солидарност, еднакви права и залагање за поинклузивни општини.
Покрај уметничката интервенција, на настанот беа презентирани и клучни наоди од анализата за учеството на жените во локалните процеси во општините Струмица, Босилово и Ново Село. Резултатите покажуваат дека во периодот 2022–2024 година, над 80% од жените во општина Струмица никогаш не учествувале во консултации за локални политики, додека во општина Ново Село ниту една од анкетираните жени не била вклучена во вакви процеси. Дополнително, истражувањето од 2025 година укажува дека над 90% од жените немаат информации за можностите за учество во граѓански консултации.
Организација на жени од Струмица и активистките порачаа дека е неопходно институциите да развиваат поинклузивни политики и механизми кои ќе овозможат еднакво учество на жените во јавниот живот.
Воедно, беше упатен повик до граѓаните, институциите и носителите на одлуки за заедничка поддршка на унапредувањето на женските права и создавање поправедни и поодржливи заедници.
Акцијата се спроведе во рамки на проектот „Жените – двигатели на промени во заедниците“, кој е дел од пошироката иницијатива „Жените го преземаат водството во локалните заедници“, реализирана од The Kvinna till Kvinna Foundation, Здружение за унапредување на родовата еднаквост – Акција Здруженска и Хуманитарното здружение „Мајка“ – Куманово, со финансиска поддршка од Делегацијата на Европската Унија и ко-финансирање од Шведска.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
