Македонските одбојкари викендов во Струмица против Естонија и Чешка во Европската златна лига !

506

Викендов во салата Парк во Струмица ќе се одржи првиот турнир од  Европската златна лига 2024 на кој Македонија ќе се сретне со Естонија и Чешка. Со естонците играме утревчер додека со чесите во недела со почеток во 20 часот. За овие мечеви билетите чинат 100 денари а во сабота на мечот Чешка Естонија влезот е слободен.

„Според моите информации, противниците ќе имаат променет состав, но за мене ова е нова генерација и во македонската репрезентација. Затоа, ние треба да се обидеме да изградиме игра, да бидеме постојани, да изгледаме како на првата пријателска со Романија во Валчеа. Ако е така, ќе имаме шанса пред домашната струмичка публика да се надеваме на победа или на две, но тоа не е императив“,вели капитенот на Македонија Никола Ѓорѓиев.

Селекторот Хари Наковски најави дека ќе има измени и во македонскито состав. Дебитираат Михајло Мирасчиев од Штип УГД и Кристијан Илиев од Струмица 47&72, Давид Стојанов ќе му биде поддршка на Ѓорѓи Ѓорѓиев на позиција техничар, а Стојан Илиев и Лука Костиќ ќе бидат во примачкиот двоец на теренот со Владо Милев.

„Ние ќе дадеме максимум и тоа е најважно за нас. Естонците и Чесите ги променија составите, но и ние сме подмладени, така што ќе играме барем за една победа. Овој турнир ќе биде на наш терен и се надевам дека со помош на струмичката публика ќе успееме да направиме добар резултат во двата натпревара. Многу ќе ни значи навивачите да ја наполнат салата и да бидат наш седми играч“, вели селекторот Хари Наковски.

Европската златна лига е значајно натпреварување, но главната цел на македонската одбојкарска репрезентација летово ќе бидат двата квалификациски натпревара за следното Европско првенство, коешто, според новиот календар на ЦЕВ, наместо во 2025-та, ќе биде одиграно во 2026-та. Македонија е во група со Грузија и со Грција, во август ќе гостуваме кај Грузијците и ќе играме дома против Грците, што значи дека уште по тие два меча може да се случи црвено-жолтите да направат значаен, можеби и клучен чекор кон четврти настап на континенталните собири едноподруго.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.