Спасе Манев ја промовираше својата прва книга ,,Патувања низ Македонија“ во која преку слика и текст ги опишува сите места и локации кои заслужуваат посети но и акцент за развој на туризмот. Тој тврди дека Македонија изобилува со многу природни убавини, културно историски места и знаменитости но и населени места богати со историја и убавини кои не се доволно афирмирани. Според него за нив никој не знае освен локалното население . Манев во кусо интервју за Дрнка.МК открива дека во книгата има и локации и места од Југоистокот за кои многу малку знаат граѓаните. Книгата ,,Патувања низ Македонија“ е дело кое треба да го има секој граѓанин за да ја истражи и запознае својата држава оти дури 70 % одсто од дестинациите и локациите не се познати на македонците .
Дрнка.МК: Дали во оваа книга се опфатени и убавините од Југоистокот и кој конкретно?
Манев: Југоисточниот крај на Македонија е еден од моите најпосетени и еден од омилените краеви во Македонија, па вметнав неколку работи во книгата и од тој крај. Има околу 7-8 туристички места и атракции од тој крај кои вреди да се посетат. Тие се едни од неколкуте туристички знаменитости кои многу ретко се знае во Македонија, освен за дел од локалните жители. Не би сакал да ги откријам кои се, а секој што ќе ја купи книгата, би дознал многу за нив. За секоја знаменитост во книгата има неколку фотографии кои лично јас сум ги направил при нивната посета и има многу информации, кои голем дел од нив ги нема на интернет
Дрнка.МК: Дали според Вас доволно сме ги посетиле сите убавини што ги има државата?
Манев: Македонија има премногу туристички дестинации кои се недоволно истражени, па дури и воопшто не се знаат. Како и во југоисточниот крај од земјата, така и во останатите краеви во Македонија. Според мене, околу 20-30% од дестинациите во Македонија веќе се знаат, но има дел од останатите што воопшто и не им се ни познати на Македонците.
Дрнка.МК: Според Вас што е она што треба да се посети во Југоистокот?
Манев: За било кој град и околина, малку е еден ден за да се посетат неколку дестинации. Многу Македонци мислат дека штом е мало местото, нема ништо да се посети, но тоа не е така. Конче е едно од позначајните места за посета, бидејќи таму има цркви и археолошки локалитети. Во градовите Радовиш, Струмица, Гевгелија, Валандово, Богданци има неколку места за посета во градот, но поради слабата туристичка промоција, многумина и не ги знаат. Освен во градовите, во нивната околина има исто така многу места кои се туристичка атракција за локалното население, но не и пошироко. Имаме и многу села кои не се посетуваат но се со огромен потенцијал за туристичка атракција. Такви села се Петрово, Конче, Серменин, Стојаково, Дојран, Николиќ, Вељуса, струмичко Ново Село итн. Повеќето места за посета се споменици на природара, културни знаменитости, археолошки локалитети, но има и такви како што се музеи, вештачки езера, а Дојранско Езеро, Паљурци, Мантово, Водоча и др. се одлични за риболов и релаксација.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
