Земјоделецот е никулец во производството на сок од калинка – приказна од ,,Органик Нар” Богданци

556

Органик Нар од Богданци, првата македонска компанија за производство на сок од калинка според светски стандарди, е препознаена како партнер во локалниот развој на Мрежата за рурален развој на Република Северна Македонија (ММР) и Шведската организација за развој We Effect. Соработката започна преку обуки и интервенции за едукација на локалното население и земјоделците за значењето на овоштарството, потсектор калинка во развојот на целиот југоисточен регион.

Органик Нар во производството на брендот Art Juice користи калинки од сопствените насади, но врши и значителен откуп од локалните земјоделци. На тој начин се отвора пазар за пласман на калинката, со мали трошоци за транспорт,а со отворање на големи можности за понатамошен напредок и развој.

Семејната старт-ап компанија го користи знаењето од минатото за придобивките од користењето на калинката во секојдневната исхрана, што сака да им го понуди и на своите потрошувачи буквално во една чаша.

,,Сокот од калинка што го носиме на трпезата на нашите потрошувачи е произведен од најубавите калинки од нашите комшии и сограѓани од Богданско – валандовскиот регион. Земјоделецот е никулецот во процесот на производство на Art Juice. Калинките се полни сончевина и љубов што ние ги преточуваме во природен и вкусен пијалок,, велат од Органик Нар.

Калинката важи за едно од најстарите овошја во светот, за неа има многу приказни и многу уметнички прикази. Науката вели дека бенефитите од ова срцевидно растение се безбројни, посебно во период на вируси, грипови и сезонски замор, подвлекува во стручната анализа на Art Juice, проф. д-р Јана Клопческа од Технолошко-металуршкиот факултет во Скопје:

,,Едни од поважните состојки на сокот од калинка за здравјето на денешниот човек и неговото брзо секојдневие се флавоноидите и танините, како и антоцијаните. Тие се еден вид пигмент што се наоѓа во растенијата, од кои има големи придобивки. Класата на соединенија флавоноиди имаат антиоксидантно дејство и се клучни во борбата со нестабилните молекули наречени слободни радикали, кои ги оштетуваат клетките и го зголемуваат ризикот од одредени болести. Сево ова го прави сокот од калинка одличен пијалок за динамичното секојдневие и постојаната загриженост за тоа дали нашиот имунитет може да одговори на сите предизвици – потенцира проф. Клопчевска.

Органик Нар продолжува со пласман на сокот на домашниот пазар, работа на нови амбалажи и вкусови кои ќе бидат најавени преку кампањата „Капка сончевина и здравје“, поддржана од ММР и We Effect.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.