Новото сообраќајно решение на обиколницата кај Богданци ќе го затвори пристапот на земјоделците до обработливите површини но и до стопанските дворови на неколку фирми. Повеќе граѓани денеска излегоа на предупредувачки протест откако согласно проектот почнаа изведбата на одводниот канал кој е спорен за нив. Станува збор за над 100 имоти, кои со изградбата на каналот ќе останат без решение за било каков пристап до било каков пат.
,, Срамота е ова, јас имам ниви овде – оранжерии. Како ќе стасам до нив ќе летам. Мора да се најде решение за да ги обработувам овие оранжерии кои ми се единствениот извор на егзистенција. Мора да се најде пристап. Или да се обезбедат премини или одводниот канал да биде затворен,, реагираа насобраните земјоделци
На овој потег има и десетина фирми кои директно излегуваат на обиколницата. Со реконструкцијата и изградбата на одводниот канал, тие најавуваат ставање клуч на стопанските објекти.
,, Јас имам овде транспротна фирма со плац и 16 камиони. Ако не ми обезбедат пристап тоа ќе значи крај за мојот бизнис. Каде да ги носам камионите,, вели Ристо Шлепетуров транспротер
Тие денеска упатија две барања или каналот да биде затворен или да имаат премини на повеќе позиции за да може да пристапуваат до своите имоти.
Градоначалникот на Богданци Блаже Шапов ни изјави дека целиот проблем е што овој патен правец од локален преминал во регионален.
,, Во контакт сме со надлежните институции и мора да се најде решение за овој проблем. Не е мала бројка на вработени и земјоделци кои егзистираат од овој дел на Богданци. Овие денови планираме да оствариме средба за да обезбедиме пристап,, вели градоначалникот Шапов.
Реконструкцијата на обиколницата чини околу 2,1 милион евра. (В.Т)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
