Општина Дојран планира да подигне монтажен објект – катна гаража која ќе биде на просторот помеѓу ресторан Нота и Ла тераса. За таа цел обезбедени се 30 милиони денари од Владата за што градоначалникот на Дојран Анго Ангов неодамна потпиша Договор со министерот за транспорт и врски Благој Бочварски со што се обезбедни првите средства за овој капитален објект.
Како што информираше Ангов во овој монтажен објект освен катна гаража се планирани и деловни објекти а со целиот тој објект најверојатно ќе стопанисува новоформираното Јавно претпријатие “Тауријан“ со што ќе обезбеди и стабилен извор на финансирање на ова претпријатие.
,, Вредноста на целиот проект е 50 милиони денари. Од Владата обезбедивме 30 што значи дека ќе се бараат дополнителните 20 милиони. Се работи за изградба на катна гаража неопходна за решавање на сообраќајниот метеж бидејки преку летото се бара место повеќе за паркинг. Во објектот ќе има и деловни простории а целиот проект ќе значи и стабилен извор на финансирање на новоформираното ЈП ,, соопшти градоначалникот Ангов.
Тој ги отфрли шпекулациите дека катната гаража ќе биде од тврда градба.
,,Според нашите проекции во таа монтажна катна гаража се планира да има и затворен зелен пазар, неколку угостителски објекти и маркет. Тоа нема да биде тврда градба како што почнаа да се шират шпекулации, туку монтажен објект од времен карактер за да не влијае врз еко системот на Дојранското езеро“, кажа Ангов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
