Официјалното жири, составено од Теа Китаришвили, Бернард Дичек и Ана Витанова-Рингачева, ги соопшти добитниците на фестивалските признанија на годинашново издание на Астерфест во Струмица
Гран при наградата за најдобар краток филм ја освои „Неми филмови“ на режисерот Крсте Господиновски, во продукција на „Фокус Покус Филмс“.
„Златната потковица“ му припадна на филмот „Крајолици на човештината“ на Јана Хунтерова, додека „Сребрената потковица“ ја освои „Душа птица“ на Тобијас Кампман, во продукција на „ММ Продукции“. Со „Бронзена потковица“ беше награден филмот „Земјата на мажите“ на Маријам Бакачо Хачвани.
Наградата за најдобар режисер „Ацо Алексов“ ја доби Елвира Барбоза за филмот „Франсин, Исток-Запад“, а наградата за најдобро сценарио „Ѓорги Абаџиев“ му припадна на Бранко Костески за филмот „Остров“, во продукција на „Контраст филм“.
Жирито додели и две специјални признанија. Наградени беа филмовите „Разденување“ на Хе-о Пак и „Оџачарот“ на Настимир Цачев.
Наградата за најдобра улога „Зора Георгиева“ ја освои Софи Томпсон за улогата во филмот „Нешто бесмислено“.
Публиката, пак, за свој фаворит го избра филмот „Девојчето што ронеше бисери“ на Крис Левис и Мациек Шчербовски.
Годинешното издание на „Астерфест“, се одржува во Струмица од 4 до 8 август, со бројни филмски проекции, средби со автори и гости и други фестивалски содржини.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
