Од 4 до 8 август во Струмица ќе се одржи 21. издание на Меѓународниот филмски фестивал АСТЕРФЕСТ. Годинашното издание, под мотото „Со отворени очи“, носи богата петдневна програма составена од натпреварувачки кратки филмови, долгометражни остварувања, специјални проекции, промоција на филмска литература и мини-работилница.
Фестивалот ќе биде отворен во вторник, на 4 август, во 20:30 часот во Амфитеатарот во Струмица. Во натпреварувачката програма ќе бидат прикажани кратките филмови „Девојчето што ронеше бисери“ на Крис Левис-Мацјек Шчербовски од Канада, „Франсин, Исток-Запад“ на Елира Барбоза од Франција, „Нешто бесмислено“ на Ејса Бејли од Велика Британија и Канада, „Рипка“ на Каушик Субраманијам од Мозамбик, „Душа птица“ на Тобијас Кампман од Данска, „Разденување“ на Хе-о Пак од Јужна Кореја, „Земјата на мажите“ на Маријам Бакачо Хачвани од Грузија и Унгарија, „Драго ми е што си мртов“ на Тауфик Бархом од Палестина, Франција и Грција, „Нилски коњи“ на Лин Цианцие од Кина и Хонгконг, „Изгубени гардении“ на Галатија Лагутари од Грција и Германија и „Ние сме вода“ на Хорхе Малика од Мексико и Шпанија.
Првата фестивалска вечер ќе продолжи со специјална проекција на филмот „Версус: Животот и филмовите на Кен Лоуч“ на Луис Осмонд од Велика Британија. Програмата е предвидено да трае до полноќ.
На 5 август, во 11:00 часот, ќе се одржи Тивериополската филмска посета на манастирот во Вељуса. Вечерната програма започнува во 20:30 часот во Амфитеатарот, со вториот дел од натпреварувачките кратки филмови.
Пред публиката ќе бидат прикажани „Крајолици на човештината“ на Јана Хунтерова, копродукција на Чешка, Македонија и Велика Британија, „Полека, брзо, полека“ на Јагода Чарнер од Полска, „Остров“ на Бранко Костески од Македонија, „Без милост“ на Ема Зафировска од Велика Британија, „Неми филмови“ на Крсте Господиновски од Македонија, „Превозник“ на Максим Кулагин од Русија и „Оџачарот“ на Настимир Цачев од Бугарија.
Истата вечер ќе биде прикажан и долгометражниот филм „Железна тврдина“ на Митко Панов, копродукција на Македонија, Швајцарија и САД, во времетраење од 105 минути.
На 6 август во 11:00 часот, во Младинскиот центар во Струмица, е предвиден придружен настан со промоција на филмски книги и мини-работилница.
Во 20:30 часот, во Амфитеатарот, ќе бидат соопштени добитниците на наградите на жирито на 21. АСТЕРФЕСТ, по што ќе следува проекција во чест на наградените. Ќе биде прикажан филмот „Филм до вжештување“ на Дарко Бајиќ од Србија, во времетраење од 80 минути.
Фестивалската програма на 7 август продолжува во 20:30 часот во Амфитеатарот, со специјална проекција на долгометражниот игран филм „Жртвопринесување“ на познатиот режисер Андреј Тарковски, копродукција на Шведска и Франција. Филмот трае 149 минути.
АСТЕРФЕСТ ќе биде затворен на 8 август во 20:30 часот во Амфитеатарот, со проекција на петте наградени кратки филмови од годинашното фестивалско издание.
Сите филмски проекции од 4 до 8 август ќе се одржуваат во Амфитеатарот во Струмица. Доколку временските услови бидат неповолни, проекциите ќе бидат префрлени во Домот на АРМ.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
