Центарот за развој на Југоисточниот плански регион планира во наредниот период да инсталира полначи за електронски возила откако денеска ја доби техничката документација за таа намена. Планирани се вкупно 20 брзи електрични полначи во сите 10 општини во Југоистокот а бројот на полначи зависи од големината на општината. Полначите ќе бидат со еднонасочна струја со моќност од 150 KW и едно возило ќе може да се наполни за 25 минути..
„Изработената техничка документација е за прв ваков сеопфатен проект во регионот и државата. Истата ќе послужи како основа за обезбедување на инвестиции за одржливи транспортни решенија на територијата на општините на Југоисточниот плански регион. Нашата следна цел е со координирани напори со општините и надлежните државни институции да ги обезбедиме неопходните средства за постепена изградба на е-полначите на предвидените места“, вели Камчев кој подвлече дека со поставувањето ќе се овозможи поинтензивно користење на возилата кои не се на погонски горива.
Според директорот поставувањето на полначите ќе овозможи и поголема посетеност на овој регион бидејки голем број на гости кои поседуваат електрични возила го заобиколуваа Југоистокот како туристичка дестинација. Според проекциите во Општина Струмица ќе бидат поставени полначи на 5 локации на 3 локации ќе има во Радовиш по две во Гевгелија, Босилово, Богданци, Ново Село и по една во Василево, Конче, Валандово и Дојран. Бројот на полначите е според проценките на самите општини kои учествуваа со 10% од вкупната цена која ќе се плати за изработка на техничката документација. Директорот на Центарот – Камчев подвлече дека веќе се лоцирани средства за поставување на првите 6 полначи.
Изработката на техничката документација за поставување на 20 полначи зе електрични возила е преку проектот „Јакнење на општинските капацитети за имплементација на проекти“, на УНДП во партнерство со со Министерството за локална самоуправа преку финансирање обезбедено од Амбасадата на Шведска и Бирото за регионален развој. (Б. Т.)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
