Уништена урбаната опрема на Вардарски Рид – општина Гевгелија бара откривање на сторителите

1085

На археолошкиот локалитет и излетничко место „Вардарски Рид“ кај Гевгелија е сторен невиден вандализам објави општината на својата веб страна. Како што стои во информацијата вандализмот го констатирале од страна на Јавното претпријатие за комунална дејност „Комуналец“- Гевгелија кога забележале дека биле испокршани и демолирани клупите за седење и корпите за отпадоци.

Вандализмот го осудија од Општина Гевгелија и градоначалникот Сашо Поцков кои побараа од надлежните органи да се преземат мерки за откривање и санкционирање на сторителот или сторителите кои дивееле на ова излетничко место.

,,Апелирам до граѓаните за високо-развиена свест и одговорно однесување кон она што е изградено за наше добро. Со ваквиот начин на однесување, само се нанесува штета на она што е заедничко наше, а со самото тоа се врши сквернавење на локалитет кој обележува една ера на вековно постоење и е истовремено излетничко место за одмор и рекреација” соопшти општината пренесувајки ја изјавата на градоначалникот на Гевгелија, Сашо Поцков.

Ова е втор вандалски чин на Вардарски Рид. Минатата година, веднаш по еко-акцијата за чистење на отпадоците и санирање на оштетената урбана опрема „Со љубов за Вардарски Рид“, организирана од Здружението „Чејнџмејкерс“ во соработка со Општина Гевгелија, беше предизвикана штета од ист карактер.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.