Струмичко Банско цела недела без вода оти некои жители си ги наводнуваат нивите од водоводот

239

Во шишиња и туби, жителите на струмичко Банско цела недела носат вода за пиење и одржување хигиена во своите домови, оти несовесни соселани водата од локалниот водовод ја трошат за наводнување ниви и пластеници. Тие денеска реагираа и побараа да се лоцираат несовесните соселани, бидејќи, како што кажаа, не е во ред на температури над 40 степени да се нема вода дома. Сега тие се принудени да чекаат ред на селската чешма или да одат по нивите, каде што имаат пумпи за наводнување.

„Со туби и шишиња носиме од нивите или од чешмата, која е од природен извор, ама слабо тече. Имам внучиња, не можеме да се испереме. Секој ден со колички носеме вода во домовите, а плаќаме за водовод. Цела недела е така. Срамно е да се нема вода, а ние сме замјоделци кои секојдневно сме по нивите. Мора да интервенираат надлежните и да ги пронајдат дивоприклучените, но и да ги санкционираат оние кои од селскиот водовод наводнуваат“, реагираа жителите од Банско кои велат дека неможе да се издржи без вода на вакви пеколни температури.

Од струмички „Комуналец“ потврдија дека имаат проблем со водоснабдувањето во ова населено место. Велат дека тоа е резултат на несовесно и неодговорно трошење на водата, со што тешко се полнат резервоарите, а во дистрибутивната мрежа нема вода или пак е со мал притисок во долните делови од селото.

„Ние сме на терен и се обидуваме да ги отстраниме аномалиите, за да се обезбеди нормално водоснабдување на жителите на Банско. Ги отстрануваме дивите приклучоци на водоводот, но тешко може да се утврди од каде се наводнува, дали од селскиот водовод или од некои бушотини“, изјави Тоди Стојанов од ЈП „Комуналец“.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.