Реконструкцијата на поројот Крушевска во Струмица се пролонгира, треба да заврши во јануари

693

Заради дополнување на основниот проект, дислокација на ЕВН кабли, вкрстување на  постоечките водоводни цевки на иста висина со новиот канал, дополнителни работи утврдени во времени ситуации, екстремно високите температури во јули и август но и заради ковид бранот кој предизвика редуциран работнички кадар,  завршувањето на реконструкцијата на поројот Крушевска република во Струмица- прва фаза се пролонгира во месец јануари.  Ова стои во анекс договорот што општина Струмица го има склучено со економскиот оператор Жикол кој според најавите или основниот договор требаше да го заврши во рок од осум месеци.

Според потпишаниот Анекс од 8 октомври, важноста на основниот Договор  е пролонгиран за три месеци,  па така реконструкцијата на отворениот канал на Крушевска – прва фаза, треба целосно да се заокружи до 8 јануари 2022 година.  Иако е побарано времено продолжување за реализацијата на проектот ,, Реконструкција на канал за атмосферски води на дел од улицата Крушевска република-  прва фаза,, истиот Анекс не предвидува финансиски импликации по буџетот на општина Струмица од каде се финансира проектот. Ова значи дека не се побарани дополнителни средства за новонастанатите ситуации од страна на економскиот оператор за продолжување на рокот.

Инаку реконструкцијата на каналот Крушевска во Струмица според основниот договор потпишан на 21  јануари годинава  требаше да заврши во октомври откако Жикол на распишаниот тендер понуди најниска цена за реализација на овој проект а на кој понуди доставија  10 компании. Највисоката беше 59 а најниската 46 милиони денари. На јавното електронско надавање или аукцијата, компанијата Жикол понуди цена од околу 35,6 милиони денари со вклучен ДДВ или околу 578 илјади евра

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.