Трошоците за производство во земјоделството растат, но не и цените на пазарите. Вака пресмета Државниот завод за статистика, според кој во јули годинава во однос на јули минатата година трошоците се зголемиле за 4,1% додека цените по кои се продавале во истиот период се намалени за 5,5%
„Оваа година агросекторот се соочува со сериозен предизвик. Од една страна, производствените трошоци остануваат високи, односно репроматеријалите, тоа се ѓубривата, заштитните средства, работната сила и механизацијата, а од друга страна кај дел од земјоделските производи откупните цени се пониски од минатата година. Ова создава притисок врз профитабилноста и одржливоста на производството“, вели Васка Мојсовска од Агро-бизнис комората.
Земјоделците од Струмичко се жалат дека годинава е доста лоша во однос и на производството и во однос на цените и пласманот. Како што тврдат годинава буквално ,,ништо не оди“. Лош беше пласманот на пролетната зелка, доматите, краставиците имаа ниска цена. Пониска цена има и куртовската капија.
„За жал, овие се некои инпути кај што и ние не можеме да издржиме вака со овие цени: доматот 20 денари, краставицата 30 денари, модриот патлиџан 10 денари, пиперката 40 денари, лутото пиперче феферонката 20 денари. Да не ги набројувам уште. Компирот да не зборувам. Значи, во градинарскиот сектор оваа година беше една од најлошите економски“, додава Памуков
Кај инпутот – највисок раст од 10,8% во овој делот на трошоците имаат цените на ветеринарните услуги и цените на енергијата и горивата од 7,9%. За една година за 3,9% пораснале и цените на средствата за заштита на растенијата како и на цената на семињата од 3,4%. Трошоците на земјоделците пораснале и кај ѓубривата од 2,2% и добиточната храна од 1,9%.
И покај високите влезни трошоци во земјоделското производство, цените кај аутпутот, односно земјоделското производство, цените во јули се движеле во спротивна насока.Цените на растителното производство се намалиле за 6,8%, додека кај добиточното производство било регистрирано благо намалување од 0,2%.Цените на овошјето и грозјето во јули споредено со истиот месец лани се пониски дури за 13,2%, на зеленчукот за 11,4%, а на добиточните растенија се намалиле за 3,7%. За 5,7% се намалиле и цените на производите од животинско потекло.
( В.Трајков / фото:Дрнка)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
