Градоначалникот на Струмица, Петар Јанков, и деканот на Факултетот за физичко образование, спорт и здравје – ДИФ, проф. д-р Влатко Неделковски, денеска потпишаа Меморандум со кој се воспоставува партнерство за реализација на заеднички активности и проекти, преку поврзување на стручниот и академскиот потенцијал на факултетот со капацитетите и потребите на локалната заедница.
Во рамки на соработката, во сите основни училишта на територијата на општина Струмица ќе се реализира проектот „Состојбата на физичкиот фитнес, нутритивниот статус и здравствениот статус кај децата и младите и рано дијагностицирање на таленти во спортот во општина Струмица“.
Преку современи мерења и тестирања ќе се следат физичкиот развој, моторичките способности, нутритивниот и здравствениот статус, како и спортските предиспозиции и потенцијали на учениците. Целта е навремено да се препознаат нивните потреби и таленти и да се создадат услови за правилен развој и насочување кон спортот.
„Нашата цел е да создадеме партнерства кои ќе донесат конкретни придобивки за граѓаните, а особено за младите. Со оваа соработка го поврзуваме академското знаење и стручност со потребите на локалната заедница“, истакна градоначалникот Јанков.
Од Општина Струмица посочуваат дека поврзувањето на локалната самоуправа со високообразовните институции претставува значаен чекор кон создавање поквалитетни услови за развој на спортот и младите.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
