Околу 3,5 милиони евра обезбеди општина Дојран изминатиов период за решавање на проблемот со дотраениот колекторски систем но и за изградба на нова пречистителна станица. Вака изјави првиот човек на ова локална самоуправа Анго Ангов откако пред извесен период добија позитивне одговор од словенската амбасада за доделување околу 1,3 милиони евра токму за овие капитални проекти. Владата претходно на општината додели околу 135 милиони денари или околу 2,2 милиони евра.
,, Од Владата имавме обезбедено околу 135 милиони денари кои што се веќе легнати на наша наменска сметка и сме во очекување на парите од Словенија за да може да отпочнеме со распишување на тендерските постапки бидејки овие пари мора паралелно да се трошат. Од словенската амбасада имаме одобрено околу 1,3 милиони евра. Парите ќе бидат искористени за реконстуркција на колекторскиот систем и изградба на нова пречистителна станица со поголем капацитет кој ќе биде енергетски ефикасен. Со тоа ќе се решава проблемот стар повеќе децении. Она што беше најголем проблем беше обезбедувањето на парите, бидејки Дојран нема толку средства. Штом ги обезбедивме парите на некој начин 90 одсто од проблемот е решен,, изјави градоначалникот на Дојран Ангов.
Како што тврди првиот човек на општина Дојран, по обезбедувањето на средствата се очекува да се распишат тендерите за реализација на двата проекти. Изградбата на новиот колекторски систем и пречистителна станица треба да овозможи и поголема заштита на езерото и подобрување на квалитетот на водата во езерото. (В.Т)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
