Гевгелија ќе воведе зонско паркирање, ќе се наплаќа од понеделник до сабота а градот ќе биде поделен во две зони

2674

Општина Гевгелија ја почна постапката за воведување платено зонско паркирање во градот. Општинскиот Совет за безбедност во сообраќајот со одредени предлози даде зелено светло за основниот сообраќаен проект за режим на сообраќај за зонско          паркирање во општина Гевгелија за кој пред да биде донесен ќе имат можност да се изјаснат и други институции, организации, граѓани.

Со тоа всушност започна јавната кампања околу зонското паркирање во Гевгелија, пред да се најде овој проект пред надлежните органи на локалната самоуправа. Имајќи предвид дека движењето на возилата и начинот на паркирање на секое јавно паркиралиште и површина наменета за паркирање се врши според сообраќајно-техничка документација, односно проект одобрен од надлежен орган.

Според основниот проект зонското паркирање во Гевгелија ќе се применува на цела територија на град Гевгелија која ќе биде поделена во две зони-зона А и зона Б. Во првата зона се наоѓаат улиците Гевгелискии партизански одреди, Кирил и Методиј, Ѓорѓи Велков, Борис Карпузов, Ристо Фаршинин, Слободан Митров-Данко од крстосница со улицата 7 Ноември до крстосница со улицата Таља Бикова, Радован Ковачевиќ до крстосница со улицата Деко Ковачев. Останатите улици ќе бидат опфатени во зона Б.

Се предлага наплатата на паркирањето да се врши од понеделник до петок во период од 7:00 часот до 21:00 часот, а во сабота од 7:00 до 17:00 часот. Во недела и за државни празници, зонскиот режим на паркирање нема да се применува и наплатува. Времетраењето на паркирање во зона А, се предлага, да е ограничено на 120 минути, додека повластено паркирање да важи само за зоните за кои е одобрено. Наплатата на цената на паркирање ќе се врши преку мобилен телефон или паркинг картички кои ќе бидат  од еден час, како и дневни паркинг карти, а претплатна паркинг карта да важи за сите зони.

Станарите на станбените објекти и лица со инвалидитет, како и корисниците на деловен простор да можат површините за паркирање да ги користат со повластени паркинг билети. Со тоа што повластени паркинг билети на станарите со идентична адреса на живеење да им бидат издадени само за две возила. Подрачните единици на државни органи сместени во подрачјето на зоната А да користат бесплатно паркинг простор за своите службени возила.

 

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.