Беласица има силна екипа за камбек во Првата лига, почнуваме со подготовките за вториот чекор, вели тренерот Милков

2302

Струмичка Беласица од утре ги започнува подготовките за пролетниот дел од второлигашкото фудбалско натпреварување во кој треба да ја завери есенското лидерско место и да се врати во Првата лига. Како што ни изјави тренерот Ване Милков прозивката е закажана утре, каде по краткиот состанок ќе имаат тестирања за моменталната физичка состојба на фудбалерите за да посериозно се пристапи во периодот во кој треба да се темпира формата за вториот ,,чекор’’ кон елитата.

,,Во овој подготвителен период ќе одиграме и неколку контролни натпревари и тоа со екипите на  Кит Го, Тиквеш, Пелистер,  Кожуф како и со бугарскиот прволигаш ФК Царско Село. Исто така еден дел од подготовките ќе изработиме во СЦ Истатов, Нов Дојран во периодот од 25-ти јануари до 2-ри февруари,,  изјави за Дрнка.Мк Милков кој изрази задоволство од учинокот на екипата во есенскиот дел од Втората лига Исток препишувајки го како заслуга на струмичките сино бели.

Беласица по есенскиот дел ја напушти само Ѓорги Марков, поради заминување во странство. Веќе биле договорени неколку нови имиња кои наскоро ќе бидат промовирани на официјалниот клубскиот веб сајт. Според Милков не се исклучува шансата во првиот тим да настапат и неколку млади фудбалери од школата на ФК Беласица.

,,Беласица има силна екипа. Спој на искуство и младост. Тоа се потврди многупати во текот на првенството. А со засилувањата кои набргу ќе бидат промовирани, и со фудбалерите кои се враќаат од повреда, значително ќе добиеме на квалитет. А за да успееме во намерата неопходна ни е и поддршката од струмичката јавност како и нашите „Ајдуци“, затоа што нашите фудбалери многупати до сега покажаа дека заслужуваат многу повеќе публика на трибини,, ни изјави Милков.

Беласица по одиграните 14 првенствени кола од есенскиот дел од Втората лига Исток каде само најдобриот обезбедува директен билет во елитата, оствари 11 победи едно реми а претрпе два пораза. Директни конкуренти за првото место се екипите на Брегалница од Штип, Тиквеш од Кавадарци, Кит го од Пехчево а во трката може да се вклучи и гевгелиски Кожуф.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.