ЈЗУ Здравствен Дом Струмица, со поддршка од Министерството за здравство, и оваа година активно се вклучи во одбележувањето на Европската недела на имунизација, спроведувајќи низа активности насочени кон информирање и едукација на населението за важноста на навремената и редовна имунизација.
Преку директни средби со граѓаните, здравствените работници овозможија одблиску запознавање со придобивките од вакцините, разјаснување на најчестите дилеми и подигнување на свеста за заштитата од заразни болести.
Настанот беше збогатен со присуство на претставници од Центарот за јавно здравје Струмица, кои со свои стручни излагања дадоа дополнителен придонес во едукацијата и споделија актуелни податоци за опфатот со имунизација и значењето на колективниот имунитет.
„Вакцините создаваат индивидуална заштита без потреба од прележување на болеста, а истовремено придонесуваат за колективен имунитет. Тој е особено важен за заштита на најранливите групи – новороденчиња, повозрасни лица, хронично болни и лица со ослабен имунитет. Високиот опфат со вакцинација е од суштинско значење за спречување на ширење на инфекции во заедницата“, соопштија од Институтот за јавно здравје
Од таму соопштуваат дека намалувањето на вакциналниот опфат најчесто е поврзано со намалена перцепција на ризикот, ширење на дезинформации и влијание на антивакцинални движења. Овие фактори создаваат услови за повторна појава на болести кои веќе биле ставени под контрола.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
