„Алма Хасанова е магистер по кинезиологија и кинезитерапија, дипломиран физиотерапевт и дипломиран академец на Националната спортска академија во Софија – една од водечките институции за спортско образование во регионот, со долгогодишно искуство како професор по физичко образование и тренер со врвни достигнувања во училишни и клупски натпреварувања во млади категории. Во својата професионална кариера има стекнато значајно меѓународно и клупско искуство, работејќи како физиотерапевт со женска фудбалска репрезентација во Германија, како и со повеќе фудбалски и одбојкарски клубови, вклучувајќи сениорски екипи и машка одбојкарска репрезентација. Во рамки на својата пракса во FizioArt, работи на превенција, рехабилитација и унапредување на физичката подготвеност, со јасен фокус на индивидуален пристап, правилна постура, функционално движење и оптимизација на спортските перформанси. Оваа година повторно е дел од стручниот тим како физиотерапевт на женски фудбалски клубови и женската U19 репрезентација на Европското првенство во Шкотска – ангажман што претставува голема чест, признание за досегашниот труд и обврска за работа на највисоко професионално ниво.“**
Дрнка МК: Алма како се најде од одбојката во женскиот фудбал?
Алма: Мојот пат во спортот започна уште од најмали нозе, благодарение на моите родители – татко ми беше спортски секретар, а мајка ми професор по физичко образование, па целиот живот сум во сала. Таа средина природно ја разбуди љубовта кон спортот, а особено кон одбојката, која подоцна стана моја професија. Образованието во Националната спортска академија во Софија, како и постдипломските студии по спортско масерство и рефлексологија, ми овозможија подлабоко да го разберам телото и неговата функција. Кога бев дел од германската женска U21 репрезентација се запознав со селекторот Кирил Изов и започнавме долгорочна соработка, која ми даде практично искуство кое изгради голема доверба во мојата работа. Потоа продолжив во ФК Истатов, каде се посветив на опоравување на играчите. Магистерскиот труд го посветив на влијанието на латералната и функционалната асиметрија врз појавата на повреди, што ми овозможи да ја продлабочам стручноста во превенција и рехабилитација. Денес сум дел од женската U19 репрезентација на ФФМ како физиотерапевт, каде го применувам целото мое знаење и искуство.
Дрнка МК: Колку е важен стручниот и професионален пристап кај сите спортисти?
Алма: Стручниот пристап е темелот врз кој се гради секој сериозен спортист. Најдобрите резултати доаѓаат кога постои доверба и јасна комуникација помеѓу спортистот и стручниот тим. Правилната техника е еден од најважните фактори за успех и превенција од повреди. Но, таа мора да биде индивидуално прилагодена. Само преку индивидуален пристап може да се постигне оптимално, ефикасно и безбедно движење. Постурата е основа на секое движење и директно влијае на перформансот и здравјето. Кај младите спортисти, поради раст и неправилни навики, често се јавуваат дисбаланси кои можат да доведат до сериозни проблеми ако не се коригираат навреме. Затоа постурата е приоритет – преку анализа, корективни вежби и контрола на движењето се создава стабилна и безбедна основа за развој“
Дрнка МК: Колку е неопходен балансот меѓу квалитетната исхрана и физичкиот напор?
Алма: „Балансот помеѓу исхрана, физички напор и одмор е клучен за одржување на формата. Секое отстапување од таа рамнотежа директно влијае на перформансот и на способноста за опоравување.Исхраната и одморот се клучни столбови. Исхраната обезбедува енергија, но одморот го создава напредокот. Понекогаш одморот е поважен од тренингот, бидејќи во тој период телото се регенерира. Без тоа, нема стабилен развој.“
Дрнка МК: Сè уште не сме подготвени за професионален пристап во клубовите и репрезентациите или грешам?
Алма: „Има напредок, но сеуште има простор за развој. Правилната техника е клучна за здраво тело и правилна постура, а неправилностите доведуваат до повреди. Потребна е поголема координација и едукација меѓу тренерите и стручните лица за создавање поквалитетен систем.“
Дрнка МК: Што е најважно во изградбата на квалитетен и професионален спортист?
Алма: „Најважно е да се изгради карактер – дисциплина, истрајност и одговорност. Спортистот треба да биде подготвен да учи, да прифаќа корекции и да остане фокусиран на долгорочен развој. Само така се создава стабилен и професионален спортист кој е подготвен за врвни достигнувања. Со индивидуален пристап и постојано објаснување на важноста на секоја вежба. Кога спортистот разбира зошто нешто е важно, мотивацијата расте.
Дрнка МК: Пораката до сите сегашни и идни спортисти
Алма: „Работете паметно и вложувајте во своето знаење. Слушајте го телото и не ги одложувајте проблемите. Вистинскиот успех доаѓа кога ќе изградите стабилна основа и ќе научите како да го одржувате телото во функција на вашите цели. Само така се создава долгорочна, здрава и успешна кариера. Успехот не е случаен. Тој е резултат на знаење, дисциплина и правилен пристап – техника, постура, грижа за телото, исхрана и одмор. Само така се создаваат стабилни и успешни спортисти“
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
