Средношколците од дрвопреработувачаката струка при ДСУ Никола Карев од Струмица почнаа да го монтираат дрвениот дел од клупите за одмор во големиот градски парк кои беа демолирани или оштетени. Станува збор за акција за која во декември минатата година учениците земаа мерка а на часовите по практична работа ги изработуваа дрвените талпи кои по процесот на обликување и заштита со боја сега се монтираат на лице место
„Акцијата за реставрација и комплетна обнова на градските клупи која е договор помеѓу ДСУ РЦСОО “Никола Карев”, ЈПКД “Комуналец” и општина Струмица, со што јавниот простор добива нов, уреден и функционален изглед. Под менторство на Никола Узунов, Јане Тенев, Коста Зингаров учениците од дрвопреработувачката струка активно се вклучени во процесот кој ќе трае, заради целосна изработка и замена на дрвениот дел за седење комплетно на сите постоечки клупи во градот Струмица, применувајќи современи техники и практични знаења стекнати во наставата“ стои во објавата на ДСУ Никола Карев Струмица
Дрнка.МК постојано информираше за оваа акција од која корист има и заедницата и средношколците кои стекнуваат нови искуства. Во декември минатата година ученици од оваа струка вршеа мапирање на оштетените клупи. Направија мерења на димензиите на дрвените талпи и потребата од нивна обнова. Констатираа дека на 190 клупи треба да се санираат.
Првиот човек на Струмица Петар Јанков во изјава за Дрнка МК подвлече дека ја поздравува оваа акција и како општина ќе застанат за да се реализира.
Реализацијата ја најави и директорот на ЈПКД Комуналец Кире Синдраковски. Тој минатиот месец кажа дека за триесетина дена ќе отпочне замената на оштетените дрвени тапли монтирани на клупите за одмор. Тогаш апелираше и да се чува урбаната опрема во градот. ( В.Трајков фото /ФБ ДСУ Никола Карев)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
