Јавната општинска установа детска градинка ,,Виножито“ од Струмица доби ВД директор. Со решение на првиот човек на општина Струмица Петар Јанков на ова позиција е поставена Јасмина Митевска која досега во установата работеше како воспитувачка. Таа доаѓа на местото на Васко Наќев кој во ноември минатата година беше именуван како ВД директор откако Софија Димитријева доби советнички мандат.
Веста е објавена на ФБ страницата на градинката „Виножито“ Струмица каде Митевска во улога на директор упати благодарност до сите вработени и најави уште потопла и посигурна средина во која децата ќе растат, учат и се развиваат.
„Со голема чест и одговорност ја започнувам оваа нова улога како директор – лидер и менаџер, но пред сè човек кој е тука, присутен и достапен за децата, вработените и родителите, како и за целата општествена средина. Верувам дека заедно можеме да создадеме уште потопла, посигурна и поттикнувачка средина во која децата ќе растат, учат и се развиваат со љубов и грижа. Од срце им благодарам на сите вработени за топлото добредојде, вниманието и прекрасниот гест. Вашата поддршка и тимски дух се најголемата сила на нашата установа. Продолжуваме заедно – посветено, одговорно и со визија за подобро утре за нашите деца.“, стои во објавата на ЈОУДГ „Виножито“
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
