Трајан Димковски од Куманово ќе биде новиот министер за земјоделство шумарство и водостопанство. Димковски досега беше шеф на кабинетот на министерот од овој ресор. Лупчо Николовски со реконструкцијата на Владата како што беше најавено ќе биде повлечен од функцијата министер и ќе биде генерален секретар на владеачката СДСМ.
Министерството за земјоделство во наредниот период ќе го води Трајан Димковски кој има завршено земјоделски факултет. Пред да стане шеф на кабинетот на министерот Николовски тој беше во граѓанската организација Рурална коалиција кој правеше анализи за работењето на институциите што го покриваат агрокомплексот во земјава.
Премиерот Зоран Заев не ја исклучи можноста за смена на директори и раководители во останатите институции од агросекторот. Ако ги има ќе бидат најавени откако ќе бидат изгласани новите министри во Владата.
Како што соопшти премиерот Заев нов министер за локална самоуправа е Горан Милевски од ЛДП, а за култура Хусни Исмаили. Разрешени се и вицепремиерот за спроведување на рамковниот договор Хазби Лика и министерот без ресор задолжен за регулатива за подобрување на инвестициската клима Зоран Шапуриќ. Насер Нуредини ќе биде нов министер за животна средина. Нуредини е инвестициски банкар и финансиски советник за банкарство во Лондон и во Виена. Досегашниот министер за животна средина Садула Дураки ќе биде на чело на новото министерството за политички систем и односи меѓу заедниците.
Заев кажа дека покрај премиерската функција ќе го преземе и раководењето на министерството за финансии и не ја исклучи можноста да биде менаџер на државната каса до следните парламентарни избори.
„Оваа одлука ја донесов заради тоа што оваа година ќе биде година за економијата. Тевдовски ќе работи околу мене, како советник. Следуваат храбри одлуки од кои бенефит ќе имаат сите граѓани“, рече Заев.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
