Струмичани како приоритетна ја изгласаа програмата за уредување на каналот на Крушевска кој треба да стане шеталиште

2391

Струмичани како приоритетна програма за реализација во идната 2020 та година ја изгласаа програмата за уредување на каналот на „Крушевска република“ а како приоритетен проект го изгласаа проектот за адаптација на улици и тротоари за достапност на лица со посебни потреби и поставување на рампи и звучна сигнализација. Ова е епилогот од Буџетскиот Форум на општина Струмица кој го реализираше во пет сесии на кои граѓаните се информираа за приходите и расходите на општината а предлагаа свои проекти и програми за идната година.

Како што е веќе познато општина Струмица во наредниот период планира да го реконстурира каналот  „Крушевска Република“ при што се планираа истиот да биде покриен и да стане шеталиште. Паралелно се планира потегот да биде и хортикултурно уреден за што ќе се работи во наредните години а целиот зафат да чини 1.300.000 евра. Што се однесува до овој порој деновиве општина Струмица склучи договор струмичката фирма ,,Еуромонта’’ за Уредување на порој Крушевска Република од стационажа 1+370.00 до 1+493.00 и расчистување од стационажа 1+330.00 до 1+370,00 во вредност од околу 5 милиони денари.

Меѓу приоритетните програми на Буџетскиот форум чија последна сесија беше синоќа, се и проширување на гасоводната мрежа но и програмата за локални патишта и улици. Како приоритетни проекти струмичани ги изгласаа ,,Поставување и обележување на автобуски постројки на места каде се чека за превоз на ученици’’ но и проектот „Реконструкции во основни училишта за енергетска ефикасност на зградите’’

,,Сите овие проекти се од особено значење, бидејки произлегоа како иницијативи и одлуки од самите граѓани и секако се проекти чија реализација значи решавање на проблемите. Сите овие проекти ќе бидат внесени во Буџетот, но трите проекти и програми треба да бидат реализирани во целост како одлука на граѓаните на општина Струмица’’, кажа Тони Милушев од ЛЕР Струмица кој го коориднираше Буџетскиот форум како алатка за партиципативно учество на граѓаните за креирање на локалните политики за една буџетска година.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.