Седум земјоделски задруги од Струмица, Гевгелија, Валандово и Богданци добија грантови од ЕУ за поддршка и развој

4170

Вкупно седум земјоделски задруги од Југоистокот добија финансиска поддршка од ЕУ во рамките на проектот ,,Поддршка за развој на земјоделските задруги’’ што го спроведе од CARE Германија и Македонската развојна фондација за претпријатија. Станува збор за четири нови и три  постоечки  задруги од Струмица, Валандово, Гевгелија и Богданци кои ќе поделат околу 450 илјади евра. Средствата се грантови од ЕУ за што деновиве на преставниците од задругите им беа доделени договорите за финансиска поддршка како и на останати 10 задруги од земјава во рамките на овој проект.

Од Југоистокот грант доби новата земјоделска задруга ,,Дабилчанка’’ од Дабиље – Струмица во висина од 80 илјади евра. Средствата треба да бидат искористени за инвестирање во магацински и дистрибутивен центар за зеленчук и опрема во лифтови, палети и додатоци. Грант ќе доби и задругата ,,Органски зрак’’ од Струмица во висина од 53 228 евра за инвестиција во магацински и дистрибутивен центар со ладилници, опрема и фотоволтаици за енергетска ефикасност.

Од новите земјоделски задруги финансиска поддршка од ЕУ ќе добие и земјоделската задруга ,,Пчелин рај’’ од Струмица во висина од 53 159 евра  за инвестиција во магацински центар и центар за преработка за пакување и складирање мед, пчелен отров и други производи од пчели и брендирање. Грант ќе добие и задругата од Валандово ,,Прва органска задруга’’ во висина од 50 384 евра кои треба да ги инвестира во опрема за пост-бербена обработка на бадеми и сродни земјоделски производи.

Грантови добија и три постоечки земјоделски задруги од Југоистокот. Задругата ,,Вегефреш’’ од струмичко Куклиш ќе добие 74 203 евра за инвестиција во магацински и дистрибутивен центар за земјоделски производи (зеленчук). На листата на грантисти до кои дојде Дрнка.МК е и задругата ,,Јужен бисер плус’’ од Стојаково општина Богданци кој од ЕУ треба да добие 59 814 евра за инвестирање во магацински и дистрибутивен простор опремен со лабораториски, палетизирање, пакување и етикетирање како и задругата ,,Петрушка река Миравци’’ од Миравци Гевгелија која треба да добие 80 илјади евра за инвестиција – магацин и простор за дистрибуција со средства за сушење и ладење

Инаку завчера беа доделени вкупно 17 договори за финансиска поддршка (ЕУ грантови) за 9 постоечки и 8 новоформирани земјоделски задруги. Финансиската поддршка е за инвестиции во објекти и опрема за преработка, складирање и маркетинг на земјоделски производи со кои се подобруваат капацитетите на земјоделски задруги и конкурентноста на земјоделството. Вкупниот износ на потпишаните договори изнесува 891.357 евра, што е само еден дел од поддршката на Европската Унија за земјоделството.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.