Општина Струмица заедно со ЈПКД Комуналец ќе подигнат зелен ѕид на влезот во градот во должина од 200 метри а кој би бил висок три метри. Зелениот ѕид од околу 600 метри квадратни, според информациите на Дрнка.Мк ќе биде на десната страна на влезот во Струмица од кај Радовиш, на потегот од кај бензинската станица на Лукоил, покрај кружниот тек и почетокот на булеварот Ленинова. Дека се работи и има одредни активности за поставување зелена ѕидна ограда, ни потврди и градоначалникот на Струмица Коста Јаневски
,, Во тек е постапката и се надеваме дека овој дел од градот ќе добие друг лик во функција на намалување на загаденоста и бучавата’’ кусо ни кажа градоначалникот Јаневски
Според информациите, зелениот ѕид ќе биде налик на наизменични шаховски полиња во кои ќе има сегменти и модули со декоративни и лозливи растенија. Паралелно ќе има и систем за наводнување на овие растенија и треба не само да го оплемени целиот овој простор туку и да ја апсорбира прашината и издувните гасови од патничките возила.
Зелените ѕидови како еден од алтернативните начини на озеленување се особено значајни за намалување на загаденоста и бучавата, апсорпција на атмосферскиот талог и подобрување на микро климатските услови на урбаната средина во однос на околината. Влијание имаат и врз здравјето на луѓето но и врз чистотата во градот.
Последните студии покажале дека зелените ѕидови се над 60 % поефикасни од сите други форми на зеленило како трева и дрвја. 12 метри квадрати зелени ѕидови заменуваат до 1200 метри квадратни парково зеленило. Во урбаните заедници каде има поставено зелени ѕидови, прашината е намалена за над 70%.
(илустрација на зелен ѕид)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
