Министерот за земјоделство, шумарство и водостопанство, Цветан Трипуновски, повторно покажува дека нема ниту слух, ниту волја да ги реши проблемите на струмичките земјоделци, се наведува во денешното соопштение на Оштинската организација на СДСМ Струмица.
Од СДСМ посочуваат дека и покрај барањето на Синдикатот на земјоделци од Струмица за итна средба поради состојбата на пазарот, од Министерството до денес немало одговор.
„Откупната цена на зелката денес се движи меѓу 8 и 10 денари за килограм, далеку под производната цена. Земјоделците јасно побараа минимум 30 денари за да не работат со загуба.Поради ваквата негрижа, струмичките ниви се претвораат во депонии, зелката се фрла затоа што никој не ја откупува, односно се приморани да ја даваат по цена од која нема профит и со тоа производителите трпат огромни загуби“ се наведува во соопштението од СДСМ Струмица
Од СДСМ бараат министерот Трипуновски итно да седне на заедничка маса со земјоделците и да понуди конкретни мерки за надминување на кризата оти секој изгубен ден значи нови штети, нови фрлени производи и нов удар врз македонското земјоделство.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
