Поништен огласот за распределба на социјални станови во Струмица – апликантите имале некомплетни документи, ќе има нов оглас

3183

Министерството за транспорт и врски го поништи огласот за распределба на социјалните станови од новата зграда во Струмица, кои требаше да бидат доделени месецов. Станува збор за вкупно 37 станови за кои апликации за добивање, поднеле 80 лица. Според министерството, 70 одсто од апликациите биле со некомплетни документи согласно огласот и немало начин како да се изврши распределбата на становите, кои со нетрпение ги очекуваат социјалните случаи за да го решат стамбеното прашање на своите семејства.

,, Очекуваме набргу да биде распишан нов оглас кој ќе биде согласно новиот закон за социјална заштита каде има нови критериуми, односно нови категории граѓани кои може да аплицираат за социјален стан. Работиме на усогласувањето на критериумите со новиот закон за социјална заштита ,, информираа од министерството за транспорт и врски, не прецизирајки кога ќе биде објавен повторно огласот за  социјалните станови во Струмица.

Со новите законски реформи се налага дополнително да се внесат нови категории на граѓани кои ќе имаат право да аплициираат  за добивање социјален стан. Досегашниот оглас опфаќаше само 7 категории на граѓани : деца без родители и родителска грижа, кои до 18 години биле згрижени во институција; корисници на социјална или постојана парична помош; лица погодени од елементарни – природни непогоди, без разлика на правниот статус на претходните живеалишта; инвалидни и лица на кои им е потребна помош и грижа од друго лице и семејства со ивалидизирани лица; лица припадници на ромската заедница социјално загрозени; самохрани родители со малолетни деца и слепи лица корисници на социјална или постојана парична помош.

Зградата со социјални станови е лоцирана на ул. „Ѓорѓи Василев“ во Струмица. Во неа има 41 стан, од нив четири веќе се доделени на Министерството за труд и социјална политика кое пак ги подели на граѓани од најранливите категории. Истата е изградена преку Програмата на АД за изградба и стопанисување со јавен и државен простор.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.