Кои се проекти ќе се финансираат од парите на ТАВ во општините од Југоистокот кои ќе поделат 4 милиони евра

2406

Речиси 4 милиони евра се обезбедени за реализација на проекти со кои десетте општини од Југоистокот аплицираа до Владата за средствата од ТАВ со кои се планираше изградба на карго во Штип.  Станува збор за инфраструктурни проекти пред се канализација и водоводи со кои општините значително ќе ги подобрат условите за живот на своите граѓани

Како што веќе објавивме 86,7 милиони денари или околу 1,4 милиони евра се за општина Струмица за проектот регулација на порој ,,Св Илија’’ од базна станица до улив на река Водочница. Втора општина од Југоистокот за која се обезбедени значителни средства е Ново Село и тоа во висина 40,5 милиони денари или околу 660 илјади евра за изградба на канализационен систем во населеното место Сушица

За општина Василево се предвидуваат средства од 417 илјади евра за изградба на системи за водоснабдување во Дукатино и Требичино а 373 илјади евра за општина Радовиш и тоа за проектите за фекална, атмосферска канализација и водоводна линија за улиците бр 1 и 15 од Урбан Блок 2 во Радовиш.

290 илјади евра од парите на ТАВ се предвидени за општина Конче за изградба на фекална канализација за дел од општинскиот центар Конче а за општина Валандово одобрен е проектот за изградба на фекална канализација и колекторски систем во Раброво во висина од 203 илјади евра додека за општина Гевгелија се предвидени 211 илјади евра за реконструкција на Домот во Прдејци.

За општина Богданци се предвидени 168 илјади евра за реализација на проектот ,,замена на постоечките шахти со мерно регулациона опрема на системот за водоснабдување’’ додека во општина Босилово ќе се реализира проектот Изградба на водоводна мрежа во населеното место Гечерлија а за Дојран од овој ,,колач’’ се планирани само 43 илјади евра за реализација на нивниот проект за канализациона мрежа во населеното месот Црничани

„Реализацијата се определува на начин што концесионерот ТАВ Македонија Илинден во својство на изведувач ќе ангажира компании коишто ќе бидат извршители на проектите“, се вели во владината одлука за распределба на околу 50 тина милиони евра од ТАВ Македонија со кои ќе се финансираат 98 проекти по општините во земјава

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.