Кои полски патишта во општините Богданци, Гевгелија, Ново Село и Босилово ќе се обноват преку Центарот за развој на Југоистокот

3861

Во општините Богданци, Гевгелија, Ново Село и Босилово ќе се санираат и обновуваат полските патишта до обработливите површини, откако Центарот за развој на Југоисточниот плански регион деновиве потпиша Договор со Министерството за земјоделство шумарство и водостопанство. Согласно договорот, со обновата на полските патишта ќе треба да се олесни пристапот до околу 278 хектари земјоделско земјиште во Југоистокот како еден од најземјоделските во државата

Како што не информираа Жулиета Ѓуркова раководителка на Центарот за развој на Југоисточниот плански регион би требало да се обноват патишта во должина од околу 2 километри кои беа предложени од општините како приоритетни за нивна санација а на барање на самите земјоделци кои со разновидна механизација ги користат за да пристапат до своите засадени ниви.

Во Општина Богданци ќе се обновува земјоделскиот пат м.в.Папрата и Барта  во должина од 735 метри и овозможува пристап до 128 хектари обработливо земјиште. Во Општина Гевгелија ќе се обновува полски пат во село Богородица во должина од 245 метри и ќе овозможува пристап до 110 хектари обработливо земјиште.

Согласно договорот во Општина Босилово ќе се обновува земјоделски пат во населеното место Робово во должина од 400 метри кој ќе го олесни пристапот до околу 20 хектари земјоделско земјиште а во Општина Ново Село ќе се санира и насипува земјоделски пат во атарот на населеното место Борисово во должина од 500 метри кој ќе овозможи полесен  пристап до 20 хектари обработливо земјиште.

Како што информираат од Центарот, во наредниот период се очекуваат дополнителни средства со кои ќе се овозможи ревитализација на пристапни патишта до земјоделски површини и во населени места од другите општини Струмица, Валандово, Конче и Василево, кои се од големо значење за земјоделските производители во Југоисточниот плански регион.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.